祝大家聖誕快樂, 新年進步

火鍋湯底

造冬打邊爐, 用咩湯底好呢? 以下是我今日曾建議過, 卻遭受家人白眼的候選湯底:
- 普洱湯底
- 紅豆沙湯底
- 橙汁湯底
- 雞鮑翅湯底
- 可樂湯底
- sake湯底
- 紅牛湯底
- 奶茶湯底
- 咖啡湯底
- 咖啡/奶茶鴛鴦湯底
- 益力多湯底
- 周打魚湯湯底
- 白蘭氏雞精湯底

以上有無你心水?

你得唔得閒啊?

如果有個人想找你幫忙, 你認為佢邊個方法好d, 比較consider人地?

1 - 直接問:「你可唔可以幫我xxx啊?」, 定係
2 - 先問下你得唔得閒, 得閒的話才再請你幫手.

就咁睇好似2比較condsiderate, 人地得閒先叫人幫啦, 唔得閒就由佢. 但實際上2係比較自我中心, 亦唔係一個體諒別人的態度.

人地得閒, 未必可以幫你架喎. 我得閒, 可能只係想同你去飲杯野, 唔代表我願意幫你做第二樣野架喎. 如果我第一句唔小心答你話得閒, 我之後又如何好意思去推卻你的要求呢?

用第1種方法問我, 我婉拒對方, 大家好地地; 但如果我話得閒又拒絕你的話, 反而變左我好似欠你咁, 非常討厭.

另一個討厭就係一接電話人地就問我響邊. 關你鬼事咩. 我通常只會答佢響街咯. 如果個問題改一改, 問「我想來找你傾下計啊, 你在不在xx啊?」, 你話好幾多呢.

中國航天員

細個果陣這個職業叫太空人, 唔知點解家下改左做航天員這個毫不浪漫的名字.

除了名字外, 以前d太空人好型架, 無論係好耐之前的火箭時代定係後期的穿梭時代, 美蘇的太空人外型都非常討好, 有探險家的style. 但今次來港的幾位航天員, 連埋上次來的那幾個, 個樣都係薯過你中學教西史個阿sir, 攪到現在d男孩對太空人無曬fantasy, 試問又點會對太空科學有興趣?

「衫可以唔洗」

近一年多左看電視, 連帶電視廣告都看多了.

近日好好笑的廣告都有兩個, 一個係光纖去到十八區, 另一個就係股價機.

第一次見到股價機的廣告時都已經比佢果句「衫可以唔洗，股票要日日睇」的tag line吸引, 加上佢用一張影得朦朦朧朧的相, 影住一個阿嬸在用洗衫板洗衫, sub-cult味十足.

昨日發現原來這廣告重有下集, 把師奶的心願道出來: 「靠住部財經機, 嬴到部洗衣機」, 真係笑到我肚痛.

不是反應慢

對於泰國有香港人滯留不能返港, 港府否認反應慢.

我同意政府的說法: 政府直情係無反應. 無又點叫得上慢呢?

北角雞蛋仔

今晚好肚餓, 食飯前都整返一底雞蛋仔. 差不多9點去到北角雞蛋仔, angela 都要排一陣隊先買到.

不過今次餅雞蛋仔好似失色左d喎, 可能因為三聚青胺的關係, 該舖改左用泰國蛋, 但又因為泰國示威d蛋來唔到, 無蛋用, 攪到無乜蛋味.

邊度有得捐贈書本?

外母大人迫佢個女即係我太太, 把娘家中唔等使的東西搬走, 當中有部分係自己唔會再用再看的書本, 唔知如何處置. 書本都係in good condition, 內容又唔out date, 當廢紙咁比垃圾婆又好似好浪費, 所以想捐左出去.

請問大家知唔知邊度有收舊書? 圖書館或者什麼地方? 早兩年好似見過有宣明會收舊書義賣, 善款支助中國山區兒童學習, 但最近唔覺有類似活動喎.

逝如風

今日介紹了Theme from Midnight Express(見另文), 同日即場再介紹同曲的廣東話版 - 林子祥的《逝如風》

Giorgio Moroder和林子祥兩個都是我很喜歡的作曲家, 這首歌由前者作曲, 後者唱出, 加上鄭國江的詞, 再由Chris Babida重新編曲, 減少了電子音效, 成首歌變了另一個主題, 另一種感覺.

不安的歌詞, 嚴謹的結構, 顯示了鄭國江的功力. 開首的三句如電影畫面, 把大家帶到一個匆匆的都市中; 往後的三句迅速地用不安的心情, 把聽眾綁紮住, 然後用三段去發展.

「即使我能留下那笑聲」那一段最是精彩, 用盡方法也不能留下任何事物的無奈. 當中的一句「想找緊倒退的星星」更是精句, 試過晚上觀星的人必有體會.

然後幾句的「願留住…」說出了自己的希望, 卻以「我想笑不成, 要哭也不成」去打破幻想. 原來除了事物逝如風, 連幻想連希望也會一併逝如風…

想欣賞這首歌的話, 請到http://www.dididoo.com/arts/music/?songID=20

Theme from Midnight Express

這是電影Midnight Express(午夜快車)的主題曲, 電影中播出的是音樂版本, 有歌詞的只有在電影sound track的唱片中找到.

電影講述的是一幕真人真事的監獄血淚: 一個美國青年在土耳其旅行回美時, 偷帶小量毒品, 結果在機場被捕. 本來只是輕微的罪名, 卻因政治原因被重判30年. 年年月月的過去,主角在土耳其牢獄中嚐盡各種非人生活, 獄吏和告密者的折磨。 他唯一的出路就是乘坐 Midnight Express離去, 意即逃獄.

電影故事不算上佳, 成為偉大電影主要因為導演Alan Parker的懾人影像, 和Giogio Moroder的震憾音樂, 效果驚心動魄. 此片更奪得 1978年奧斯卡最佳原著音樂奬 -- 這是第一次有電子樂形式贏得奧斯卡最佳配樂獎.

電影最著名的音樂是Chase, 你必定曾聽過. 而我今次要介紹的是這首主題曲. 主題曲連名都無的, 只叫Theme from Midnight Express.

這首歌充滿迷惑, 應該是以主角女朋友身份唱出, 兩句歌詞Until you touch the open sky, then I will keep the sun for you看似無助卻有鼓勵. 順帶一提, 主角女朋友探監一幕非常痴線, 卻不突兀, 非常震憾.

想欣賞這首歌的話, 請到http://www.dididoo.com/arts/music/?songID=19

高危行業

昨日匯豐裁員450人, 上星期dbs又cut人, 花旗又有傳聞. 早兩年的銀行工, 尤其係i-bank要爭崩頭先入到去, 現在反成最高危的行業.

朋友戲言, 有兩個人想趁現在市道低迷借錢買樓, 一個做銀行, 一個失業, 銀行寧願借錢比個失業的都唔借比做bank的, 認真諷刺.

2008年的香港經濟已高度集中於金融業, 每個人身邊隨時有10個friends做保險, 5個做銀行2個i-bank, 今次的今融海嘯真係沖到香港正一正. 最慘係最差時刻還未到臨.

除了自求多福外, 也祝大家順利過渡.

無晒痴線佬

近幾年, 香港少左好多痴線佬, 又少左好多蠢的細路.

所有痴線佬都變晒做思覺失調, 蠢的細路唔係蠢, 只係有學習障礙.

同樣, 香港的失業人士都變成待業, 妓女只是性工作者, 老人家應該是長者才對, 阿差改名叫南亞裔人...香港好像減少了歧視.

這是好的發展, 但還遠遠不足夠. 我們還可以對別人尊重多點, 包容多點. 對和自己地位思想不一樣的, 接納多點.

經濟日差, 每人的壓力會愈來愈大, 我們更應團結起來, 互相尊重, 減少紛爭 -- 這方面希望尊貴的議員們高官們以身作則, 減少無謂的爭吵吧.

candle in the wind

1997年全世界最流行的歌必定是candle in the wind. 很多人以為這首歌是elton john為了故友戴安娜皇妃而作的. 對了一半: 這是一首1973年的舊作, 戴妃去世時elton john打電話給老拍檔bernie taupin留言, 請他為戴安娜寫一首類似舊作candle in the wind的歌詞, 點知bernie聽錯左以為重寫該曲的歌詞, 結果變成舊曲新詞了.

光計歌詞和演繹, 還是原曲勝一籌.

原版所歌的也是一位傾城美人 -- 瑪麗蓮夢露. 歌曲的第一句 good bye norma jean, 當中的norma jean就是夢露的本名. 歌詞不用她夢露這個出名的名字, 反而用了無太多人知的本名, 就是要說出作者看到的, 是美人的本性, 而非在鎂光燈下的性感女神.

夢露去世時, elton john只得15歲, 他以一個小影迷(from the young man in the 22nd row) 的身份, 看待夢露絢爛而悲慘的一生. 歌詞描述夢露雖然貴為超級巨星, 卻受到荷里活的聲色誘惑和摧殘, 失去完自我, 終日與寂寞為伴, 直到自殺身亡, 媒體依然不放過她, 將她裸體陳屍情景, 鉅細靡遺的報導出來. 但作者認為雖然夢露一生悲哀無依, 卻己成為可歌頌的不朽傳奇.

想欣賞這首歌的話, 請到http://www.dididoo.com/arts/music/?songID=18

陳水扁

早年的陳水扁, 的確是一個有為有理想的青年, 但權力令他腐化.

腐化很正常, 但腐化得像他那樣無賴真的是難得一見. 從四年前的子彈疑雲, 到今天把自己的貪污說成政治的迫害, 他的手段的確層出不窮.

不過想深一層, 如果他不這樣做, 又可以怎樣呢? 一直以來的死口否認貪污, 今天要認錯也已經太遲了, 不如把自己的敵人都拖下水, 去抹黑, 自己心理上都可能好過點 -- 雖然這是極其無恥兼無謂.

有時我們看電視劇, 會罵劇情怎會有如斯到大結局還要害人不利己的壞旦, 原來事實真有這樣的一個人. 可惜這人不是劇集的虛構角色, 而是會永遠成為台灣人的恥辱, 民進黨的瘡疤, 華人民主政治的傷口.

中學同學

近兩三個星期, 都見返好多中學同學.

剛於上星期日參加完校友盃足球比賽, 今年的成績比去年進步很多. 踢了兩場, 第一場對大我們六七年的師兄, 雖然先落後一球, 但我們後來追上連入兩球勝出. 第二場波, 我地這隊90年畢業的舊生, 對90年出生的小師弟. 全場我們發揮較好, 1:0領先, 完場前2分鐘卻遭追平. 結果兩場一勝一和, 但得失球不及師弟那隊而無奈出局.

今晚呢, 因為鄺sir昨天生日和阿蘇明天牛一, 約了幾個老死到北角的東寶小館食飯, 大家無無聊聊咁, 都傾得好開心.

其實我最喜歡的朋友, 還是認識了二十年那一班, 希望我們能多點機會見面.

為什麼樣樣有d?

在2000年開始, 我已有在類似今日blog的地方寫無聊野, 那地方叫didFriends. didFriends記錄了我人生一個重要的階段.

那階段早已完了, 而didFriends到今日也應完成它對我自己的歷史任務, 另起爐灶也就順理成章.

我在didFriends時個朵叫dididoo, 真名叫dustin, 寫email之類個署名是ddd, 似乎我對個d字情有獨鐘, 所以這個blog自自然然就有個d字, 就是個招牌, 希望大家認得.

在這個blog我會寫什麼我也沒打算, 可能會好雜, 有d會是我聽返來的, 有d會是我思我想的, 有d會是我回應別人的, 有d會是我所作所為. 叫個blog做樣樣有d, 咁就一定唔會離題啦.

希望這個樣樣有d的blog啱你睇.