假如匯豐倒閉 - 上

近日忽發奇想, 如果匯豐倒閉, 會對香港的金融體制有什麼影響. 我自己都想不出答案, 所以去問專家. 在香港有誰比金管局更專家呢? 所以我send了以下email到金管局.

有回信時會post出來. 在等回信時, 大家不妨發表一下你的睇法.

致金管局:

你好, 我本人對香港銀行體制、貴 局對本港金融機構的監管、以及對匯豐銀行都充滿信心, 非常信任。 然而匯豐與香港的關係非比尋常, 作為香港市民, 非常有興趣知道, 假使有一天匯豐真的因資不抵債, 又沒有其他商業銀行願收購時, 對香港有多大影響。以下是我就各方面提出疑問, 希望貴 局能撥冗解答。

金管局 / 香港政府會否注資
--------------------------------------
Q1.1 - 匯豐早年已遷冊倫敦, 金管局或香港政府會否注資一間英國銀行?

鈔票如何處理
-------------------
Q2.1 - 匯豐發行的紙幣會否變得毫無價值?
Q2.2 - 發鈔銀行是以美元作backup的, 假如匯豐倒閉, 金管局或香港政府會有什麼措施或機制, 令手持匯款鈔票人士, 兌換成其他發鈔銀行鈔票、或金管局發行之港幣, 又或者是美元呢?
Q2.3 - 銀行每發行$7.8的鈔票, 便需存入1美元到金管局. 請問該美元存款是否仍屬發鈔銀行? 如匯豐破產, 其於金管局的美元會否因破欠條例而被凍結?

存款/借貸
-------------
Q3.1 - 我相信香港政府於匯豐銀行有很大量的存款, 如匯豐倒閉, 會對香港政府的財政有多大影響? 又會否波及金管局的財政?
Q3.2 - 匯豐作為本港同業拆借市場中一名非常重要的參與者, 金管局有什麼措施以防止一家銀行的倒閉嚴重影響到其他銀行的穩健?
Q3.3 - 匯豐作為本港樓宇貸款的放款者, 如真的倒閉, 在匯豐做mortage的人, 會否即時被call loan? 繼而大幅拖低樓價? 金管局或政府有什麼措施防止或減低影響?

出糧戶口
-------------
Q4.1 - 香港公務員、社會機構以及各大小商業公司的出糧戶口, 大都在匯豐, 如果一旦匯豐倒閉, 是否香港會有大多數人不能獲發工資? 金管局又有否任何保障措施?

以上是我對匯豐銀行一旦倒閉時, 比較關心又與貴 局有關的問題, 希望貴 局能抽空解答.

謝謝, 並祝工作愉快

市民
Dustin

熱香餅餐 - 下集

匯豐股價跌到得返六十幾蚊, 咁的環境下, 比人呃左隻豬喎, 一個幾毫都要同佢死過啦.

今朝入到麥當勞, 先增值八達通200蚊, 之後拿出昨天張收據, 同個麥妹妹講:「唔該一份早晨全餐飲橙汁外賣, 另外我昨天來買熱香餅餐你地比少左塊豬柳我喎.」

佢睇睇張單, 然後好客氣咁講唔好意思, 然後問我想點. 我就話你比返塊豬柳我啦. 佢二話不說就比左一份有兩塊豬柳的早晨全餐我.

我今朝都唔肚餓, 所以只飲了杯橙汁同件hash brown. 其餘的我放入雪櫃中午叮來吃. 好飽.

其實我知道麥當勞一定會比返塊豬柳我的, 因為麥當勞真係幾好蝦. 我讀中學時的經歷可證明:

話說我讀中四定中六時, 有一段時間常和一班同學午餐光顧麥當勞, 其中一個同學叫「奸仔」, 佢試過叫一個芝士漢堡包, 先食左塊芝士, 然後拿返去個counter話無芝士, 麥當勞即刻換過比佢.

之後有一次重離譜, 又係奸仔叫左個漢堡包, 食到得返四份一, 再拿起塊牛扒, 走返去同佢講無牛扒, 叫佢換返, 居然都肯比佢喎.

咁神奇的事都可以發生, 我這種真正的受害者, 有咩可能取不回我的小小公道?

熱香餅餐 - 上集

今早去麥當勞買個熱香餅餐外賣, 佢比少左塊豬柳喎.

其實我都只係想食個熱香餅, 又唔係好想食佢塊豬柳, 所以都唔覺有咩損失. 之但係我真金白銀比錢買架嘛, 佢少比左我又有d唔甘心喎. 我保留左今朝張單, 看看我明早能不能討回公道.

...待續

你大個想做什麼?

我中學時有位老師問我, 問我大個想做什麼. 我說不知道.

為什麼不知道? 你問我「大個左想做什麼」, 那我要大個左才知我想做什麼; 但如果你問我「想大個左做什麼」, 我會答你我想做xxx. 「大個左想做什麼」和「想大個左做什麼」是不同的.

我當時不覺得自己好寸, 只是用最strict的答案去回答, 順便耍一耍小聰明而已.

昨日無啦啦想起這無聊事, 忽然覺得好對唔住那位關心我的老師, 後悔自己把口做乜咁衰. 老師, sorry.

受委屈的魔鬼

萬物都是上帝所作的, 包括善與惡.

善惡是上帝所定的, 上帝把祂所喜的定為善, 把不喜歡的稱為惡. 如此, 上帝的善並沒有什麼偉大, 沒有什麼值得稱頌, 因為祂只是做祂所喜歡的事罷了 -- 我有了這個想法多年, 直到最近才想到另一面.

魔鬼是惡的. 魔鬼一定是惡的. 但魔鬼的惡似乎來得有點無奈. 他只是喜好和上帝有所不同, 而就是這不同的興趣, 僅僅是有不同的興趣, 上帝就教我們魔鬼永遠是惡的.

我不知先有罪惡還是先有魔鬼, 但從這角度看, 魔鬼挺可悲的.

特別普通

如果我話你唔止靚, 重係特別靚, 咁即係你好靚好靚.

如果我話你唔止生得高, 重係特別高, 咁即係你好高好高.

但如果我話你特別普通, 咁你究竟是普通啊? 還是不普通呢?

油油油到我手痛

其實唔係油油攪到我手痛, 係鏟底同磨沙紙整親.

事緣係我屋企個廳有幅牆, 可能因為之前外面水管關係,「撲」曬出來好核突, 所以我趁這幾天有時間自己油返佢. 結果我整得好肉酸, 好唔滿意. 以下是我油油的部分過程

未整前, 窗右面幅牆「撲」得好樣衰



去油漆舖買齊工具, $220, 包括鏟、大小油掃、泥板, 油、司拿、補牆灰, 砂紙等.



本來我地幅牆之前係巴馬士的(Permoglaze), 貪佢少假野同埋英國皇室都用佢, 點知去到間油漆舖佢話無喎. 咁我就打返電話比之前的裝修師傅阿輝哥, 問佢邊度買到, 再請教下佢油油的程序咁. 點知輝哥話我知間廠摺左喎. 唯有去個油添舖配返隻不多色, quality又ok的啦, 結果選左nippon paint #1902


開工前, 移開張osim, speaker, 大牛龜電視, 擴音機同梳化先.




這幅窗簾都要用d時間同iq先拆到落來.

我的工衣和工鞋 (咁條褲呢? 著住左)


開始鏟左舊d油同爛左的地方


「扮」工作中的我, 因為沙塵滾滾, 所以要戴mask.

鏟牆補牆磨砂紙油油, 有時又要等d野乾, 前前後後都用左四日先完成. 當中的第一日最辛苦, 因為要用力鏟走d舊油同埋爛牆. 原來鏟牆都要有d節奏先有效. 唔怪得d油漆師傅咁好唱口, 原來係可以用唱歌來keep住個節奏的. 而我唱的歌唔知點解會係《滄海一聲笑》

磨砂紙都好累人的, 我隻手到現在還有少少痛, 手指又有些少擦傷.

一來時間關係, 二來我油油時無人幫我影相, 所以skip曬. 過了四日終於完成了, 遠睇都好似ok, 不過呢....
近睇其實「岩岩獑獑」.

算啦, 雖然好唔滿意, 但已無氣力再重新來過了. 二來其實外牆有個大洞, 唔整返佢都可大可能再爛過. 等過完年成個building大維修先算啦.