匯豐股價跌到得返六十幾蚊, 咁的環境下, 比人呃左隻豬喎, 一個幾毫都要同佢死過啦.
今朝入到麥當勞, 先增值八達通200蚊, 之後拿出昨天張收據, 同個麥妹妹講:「唔該一份早晨全餐飲橙汁外賣, 另外我昨天來買熱香餅餐你地比少左塊豬柳我喎.」
佢睇睇張單, 然後好客氣咁講唔好意思, 然後問我想點. 我就話你比返塊豬柳我啦. 佢二話不說就比左一份有兩塊豬柳的早晨全餐我.
我今朝都唔肚餓, 所以只飲了杯橙汁同件hash brown. 其餘的我放入雪櫃中午叮來吃. 好飽.
其實我知道麥當勞一定會比返塊豬柳我的, 因為麥當勞真係幾好蝦. 我讀中學時的經歷可證明:
話說我讀中四定中六時, 有一段時間常和一班同學午餐光顧麥當勞, 其中一個同學叫「奸仔」, 佢試過叫一個芝士漢堡包, 先食左塊芝士, 然後拿返去個counter話無芝士, 麥當勞即刻換過比佢.
之後有一次重離譜, 又係奸仔叫左個漢堡包, 食到得返四份一, 再拿起塊牛扒, 走返去同佢講無牛扒, 叫佢換返, 居然都肯比佢喎.
咁神奇的事都可以發生, 我這種真正的受害者, 有咩可能取不回我的小小公道?
7 則留言:
哦, 拿返咪好囉. 你個同學的舊事你記到今日. 記得唔話比佢D下一代聽呀, 影響形象就唔好啦.
我肯定佢會自己同個仔講啊. 這是少年頑皮事, 得啖笑啫, 不用太緊張
佢呢單野又真係好經典, 不過有一點要更正, 據我所知, 佢係叫咗個豬柳蛋漢堡, 食咗塊蛋, 再換過另一個. 芝士漢堡包塊芝士應該溶咗, 好難分得開.
不過網絡世界都好恐怖, 廿幾年前單野都可以掘番出黎, 佢今時今日都叫有頭有面, 小心d唔好開名呀.
我都唔記得太清楚, 不過你講得十分有道理, 應該你啱.
其實優秀的創作人, 應該有大膽的想法, 然後能付諸實行. 這位同學原來自小已經這種特質, 怪不得他有咁好的成績.
我相信全世界最平的MC記就係係HK.
香港的麥當勞真係好平. the economist雜誌每年都用各國家big mac的價錢來制作big mac index, 反影不同地方的消費水平. 其中香港差不多是最平的, 只比馬來西亞貴1美仙. 如果考慮埋各地人民的平均收入, 香港麥當勞一定係最平的.
但佢的burger永遠唔會有1pound angus beef食. 我地呢度又食唔到炸得剛剛好的魚. 賣的內容其實都唔係好同, 但都係係HK食得開心D.
張貼留言